KALIBO, Aklan–Mas mayad nga mag-bulanglang ukon magpinakbet anay kaysa nga mag-chopsuey.
Raya hay matapos nga mataeupangdan ro pagtaas sa presyo it mga baligya nga tinuean-on nga sangkap sa pag-eaha it chopsuey sa mga tindahan ag iba pang baealigyaan.
Suno kay James Earl Ogates, tagapaghambae it Department of Agriculture (DA) region 6 nga base raya sa monitoring it agri-business and marketing assistance division.
Indi sigon malikawan nga magtaas ro nasambit nga mga tinuea eabi eon ro mga high value crops bangud nga nagahalin ro mga raya sa Luzon.
Samtang ro mga bulanglang nga may sangkap nga taeong, kaeabasa, hamtak, okra ag iba pa hay bugana ro supply sa Western Visayas.
Mag-eowas kara, nakaangkon man it pagtaas sa presyo it asukar ag mantika.
Sa pihak nga parte, nagapabilin sigon nga bastante ro supply it livestock sa rehiyon maskin nga sambilog raya sa naga supply sa Luzon.
Suno kana ro presyo it karne it baka hay nagahampang makaron sa P280 hasta P300 per kilo; ro karne it baboy hay P280 samtang ro manok hay P188 ag ro dressed native chicken hay P300 per head.
Padayun suno kana ro pagtinguha it DA 6 nga indi makasueod sa rehiyon ro African Swine Fever ag Avian Influenza ukon Bird flu.
Ginabantayan man nanda ro pagpanaeasa it fall army worm sa pag-umpisa it pagpananum it mais.
