KALIBO, Aklan—Mas pang ginapabaskog it Provincial Highway Patrol Group ro implementasyon it “No Helmet, No Travel” policy.
Suno kay P/staff sgt. hecler Villanueva it HPG-aklan nga ro polisiya hay base sa Republic Act No. 10054 ukon mas kilaea sa tawag nga “Motorcycle Helmet Act of 2009.
Sa idaeum it laye, ro tanan sigon nga motorcycle riders kaibahan ro driver ag back rider hay kinahangean nga magsuksok it standard nga protective helmets samtang nagasakay sa motorsiklo.
Tuyo kara nga maprotektanan ro mga riders bangud nga epektibo sigon ro pagsuksok kara agud nga matapna ro grabeng kahalitan sa eawas partikular ro pag-angkon it head injuries.
Ro ginasita sigon makaron hay ro tatlong sakay it mga motorsiklo.
Maskin suno kana nga may helmet hay dapat nga may suksok man nga face mask.
Samtang, mag-eowas sa helmet policy, hugut man nanda nga ginapatuman ro Republic Act 4136 ukon Land Transportation Code sa tamang paggamit it inner ag outer lanes it mga nagapangunang karsadahon ag national highways.
Uman nga ginpadumdum ni Villanueva sa mga motorcycle ag tricycle drivers nga sanayon eon ro paggamit it outer lanes it karsadahon agud nga malikawan ro penalidad ag aksidente.
