KALIBO, Aklan—Mas pang nabatyagan ro uman nga pagbaskog it turismo sa isla it Boracay matapos nga makalista ro Malay Tourism Office (MTO) it masobra 6,900 nga turista kada adlaw umpisa nga ginpaidaeom sa Alert level 1 ukon New Normal ro probinsya it Aklan.
Base sa datus it taeatapan, naga-abot eon sa 20,819 ro tourists arrival umpisa Marso 1 hasta 4.
Suno kay Malay Tourism Officer Mr. Felix Delos Santos nga amat-amat eon ro pagbuhos it foreign tourist halin sa Amerika, Britanya, Germany ag maabu nga iba pa.
Ginaeauman nga magpadayun eon ro mataas nga tourist arrivals bangud sa nagahilapit nga summer vacation.
Ginpahayag dugang nga nakaapekto man sa pagtaas it numero it mga turista ro pag-abot it mga delegado it 2022 Philippine Councilors League End-Term Assembly.
Kung siin, ginakaeakipan raya it masobra 1,500 nga mga konsehal halin sa Luzon, Visayas ag Mindanao.
May kaangtanan kara, positibo man ro mga negosyante sa isla nga maskin paalin hay makabawi eon sanda sa andang kita matapos ro mabuhay nga tyempo.
Nasayuran nga naga-abot sa P62 bilyon ro kita sa tourism receipts it isla ko 2019 antes tumama ro pandemya.
