ginapapahaum makaron it Kamara ro mga natungdan nga ahensya it gobyerno ag ro mga consumer sa posibleng pagtaas pa it sukot sa mga utility.
Raya hay bangud sa pagbaskog it US dollar kontra piso nga kan-o eamang hay nag abot sa ₱55 pesos ro kada sang dolyar.
Suno kay Deputy Speaker Bernadette Herrera, eauman eon ro pagtaas sa sukot sa kuryente, tubi ag telecom rates tuga it dugang nga ‘foreign adjustment costs’.
Bangud kara, kinahangean sigon nga maghueag ro gobyerno agud nga masiguro nga owa it magiging pagtaas sa presyo it pagkaon ag utilities.
Dapat man sigon nga makaangkon it bastante nga supply it bugas, trigo, asukar ag mais sa nasyon agud nga matupungan ro konsumo it kada baeay kamana man sa produksyon it mga animal feed maker ag livestock raisers.
Gin engganyo man it mamalidha ro Energy Regulatory Commission (ERC), Wholesale Electricity Spot Market (WESM) ag mga water regulatory agency nga desisyunan eon ro mga naka-pending nga petisyon ag mga kaso angot sa refunds ag rebates sa mga consumer.
Ginhinyu man ni Herrera nga taw-an it rice subsidy ro kada pigado ag middle-income households depende sa kabahoe it pamilya kamana man nga dugangan ro subsidiya para sa mga mangunguma, mangingisda, livestock raisers ag vegetable growers agud nga mapahagan-hagan ro epekto it pagtaas pa it dolyar sa piso.
