KALIBO, Aklan—Nauli sa rambol ro masadya kunta nga bayle sa Barangay Pagsanghan, Banga bilang kaparte it selebrasyon it andang kapistahan makaron nga adlaw it Miyerkoles.
Suno kay kagawad Arnolfo Dominguez nga natabu ro insidente kaina it aga-aga samtang nagapatapos eon ro binayle.
Ginasugid nga may gin-awat nga daywang indibidwal nga nakaangkon it owa pagka-ilintindihan sa tunga it dance floor, apang nagkagitgitan nga nagresulta sa pagbaeaywan.
Ro iba sa mga biktima hay naka-confine sa Aklan provincial hospital matapos nga eampusan it butong ag may una man nga tinamaan it bubog it nabasag nga bote.
Mas pa sigon nga nag-grabe ro sitwasyon matapos nga makisawsaw ro iba tuga it impluwensiya it makahieilong nga ilimnon maskin nga owa nakasayod it gin-ugatan it insidente.
Pila sa mga naging biktima hay halin sa andang kaiping nga barangay nga nakibayle eamang.
Napundo eamang ro kinagamo matapos nga magpatunga ro pilang opisyal ag tanod sa lugar.
Suno pa kay Kagawad Dominguez nga antes ro kinagamo hay nataeupangdan ro sobrang pagka-enjoy it mga tawo matapos nga haeos daywang dag-on nga owa naka experiensiya it binayle tuga it covid 19 pandemic.
