KALIBO, Aklan—Ginkondena it sangka senador ro masami nga power interruption nga naeksperyensyahan sa Western Visayas.
Suno kay Senator Risa Hontiveros, bukon it makabaeaton ro permi nga black out kapin eon sa probinsya it Aklan bangud sa kakueangan it supply it kuryente.
Bangud kara, nag-apela imaw sa National Grid Corporation of the Philippines ukon NGCP nga limpyuhan ro linya agud nga taw-an it daean ro renewable energy nga makasueod ag makasupply it kuryente.
Raya hay kasunod it mga rotational power interruption bangud sa kueang nga mayad ro supply it kuryente.
Dugang pa ni Hontiveros nga bukon it makatarungan ro masami nga power interruption eabi eon sa Aklan bangud nga iya ro isla it Boracay nga naga-engganyo it mga kapitalista para sa ikaumwad it ekonomiya.
Mag-eowas kara, natabing man ro isyu sa mataas nga panueoktan sa kuryente nga raya sa makaron ro ginareklamo it mga konsumidor.
Madumduman nga ginhinyo ni Hontiveros nga repasuhon anay it Energy Regulatory Commission (ERC) ro mga panueoktan sa kuryente bago raya ipasa sa mga konsyumer sa andang bueanan nga bill.
Suno kana, dapat anay mapamatud-an ag maipaathag ro kada sukot bago raya awtomatikong kolektahon it mga distribution utility, partikular ro mga pass-through charges kaparehas it generation costs nga naapektuhan it pagbag-o sa presyo it gasoline.
Ginatantyang kapin sa 77 porsiyento it ordinaryong residential electricity bill ro ginabilog it generation, transmission ag system-loss charges.
