KALIBO, Aklan—Pursigido ro tag-ana it taeamnan nga pasakaan it kaso ro suspek nga nagpanakaw sa anang mga tanum nga maraguso sa bahin it Brgy. Linabuan Sur, Banga.
Raya hay matapos nga maaktuhan ni Mr. Reynaldo Siason, residente it Brgy. Jumarap, Banga ro suspek nga ginkilaea kay Ronie alyas “Batu” Pereira, residente it Paraiso Road sa nasambit nga lugar nga nagabuoe it mga bunga it maraguso ko Enero 30.
Ginabuebanta nga masobra 100 kilos ro nabuoe it suspek ag iba pa kara nga kaibahan sa daywang beses nga pagpanakaw sa taeamnan nga ro una hay ko Enero 26.
Suno kay Siason nga madasig nga nagpaeagiw ro mga suspek matapos nga matueopangdan ro anang pag-abot sa taeamnan rason nga si alyas “Batu” eamang ro nadakpan.
Ro nasambit nga suspek hay dating trabahador it pamilya Siason apang ginpahalin matapos nga owa sanda nagkasugot sa presyo it bayad sa pagpaubra.
Ginpahayag dugang nga bantog raya nga manakaw sa andang lugar rason nga owa haeos it may nagakumpiyansa.
Mabahoe man ro pagkanugon ni Siason sa anang mga pananum bangud ginpilit it buoe it mga suspek ro bunga maskin nga buyog pa ro iba.
Si alayas “Batu” hay magapangatubang sa kasong pagpanakaw kung siin gin-inquest eon raya ko adlaw it Lunes ag nakataeana nga igasaylo sa Aklan Rehabilitation Center.
