KALIBO, Aklan — Kapin sa 3,400 nga mga pamilya halin sa tatlong barangay it Boracay ro uman nga nakabaton it food boxes halin sa Department of Social Welfare and De-velopment (DSWD).
Ginpahayag ni Leo Quintilla it DSWD region 6 nga ginpangunahan it LGU-Malay ro pagpanupod it nasambitang mga food boxes.
Dugang sigon raya sa masobra sa 22,000 nga food packs nga naipanupod eon sa masobra sa 12,400 nga pamilya sa isla.
Ro kada food boxes hay may an-om nga kilong bugas ag nagkaeain-eain nga mga delata.
Ginpasiguro man ni Quintilla nga padayong magabulig ro DSWD sa mga Boracaynons apisar nga magabukas eon ro isla sa Oktubre 26.
Ro nakabaton it food boxes hay may mga ginabuytang Disaster Assistance Family Access Card (DAFAC) nga nauna eon nga natumod it LGU.
Nasayuran nga naging kontrobersiyal ro naunang ginpanupod nga food packs it DSWD bangud ginapahayag nga expired eon ro mga raya ag maabong nagakarang nga insekto sa bugas base sa reklamo it pilang mga residente.
