KALIBO, Aklan–Naga-abot sa 7,356 ka mga rice farmer halin sa pitong munisipalidad it probinsya it Aklan ro nagbaton it P5,000 nga bulig pinansyal halin sa Department of Agriculture.
Suno kay Ilyn Belinario, Provincial Coordinator it DA nga naga-abot sa masobra P35,000,000 ro natigayun nga mairelease nga pondo para sa natungdan nga benepisyaryo.
Ro kwalipikado sigon nga magbaton it ayuda hay ro mga mangunguma nga naka-rehistro sa RSBSA ag naga-uma sa indi magsobra sa daywang hektaryang eugta.
Kinahang-ean eamang sigon nga magpresenta it mga benepisyaryo it stub, sangka valid ID ag rice farmer’s ID sa pagclaim it cash assistance.
Ginpahayag dugang nga ro pondo nga gin-release para sa programang Rice Farmer Financial Assistance hay halin sa Rice Tarrification Law.
Tuyo kara nga makabulig sa production cost it mga mangunguma eabi pa ag sigidas ro pagmahae it presyo it fertilizer.
Nasayuran nga nakapatigayun eon sanda it initial release ko Disyembre 2022.
Samtang, naga-abot man sa 31,641 ro kabilugan nga numero it mga rice farmer sa probinsya it Aklan nga magabaton it ayuda nga nagakahaeaga it kapin sa P158,204,000.
