KALIBO, Aklan—Naga abot eon sa 7,716 ro numero it mga nabakunahan kontra COVID-19 sa banwa it Kalibo.
Suno kay Hernan Lorenz Laserna, Nurse 2 it Municipal Health Office ukon MHO-Kalibo nga base sa andang datos , kapin sa 3,245 ro nataw-an it unang dose it bakuna samtang kapin sa 4,425 ro nakabaton it ikaywang dose ukon fully vaccinated nga mga pumueuyu nga sakop it priority group nga A1 hasta A4.
Ro kabilugan suno kana nga numero it doses it bakuna nga naiturok hay naga abot sa 10,016.
Apang masyado pa raya nga maeayo sa target nga 50,000 nga eligible population agud nga maabot ro ginatawag nga herd immunity.
Ro tanan sigon nga bakuna nga ginturok hay naghalin sa provincial government kun sa siin ro pinaka ulihi nanda nga vaccination roll-out hay ko biyernes nga adlaw gamit ro 359 doses it moderna vaccine sa kalibo pastrana park covered court.
Pila sa mga nakabaton kara hay ro mga OFws nga nakataeana nga magabalik abroad.
Sa pihak nga parte, sa masobra sa 6,000 nga mga senior citizens sa kalibo, haeos 4,000 eon ro nabakunahan ag kabilugan nga 2,777 ro fully vaccinated.
Ro may comorbidities, ro naturukan it bakuna hay kapin sa 2,215 kun sa siin ro nakabaton it 2nd dose hay 1,086.
Sa pihak nga parte, gin umpisahan eon man sigon nanda ro hinyu it sangguniang bayan it Kalibo nga pagpatigayon it house to house covid 19 vaccination sa mga vulnerable sectors nga nalisdan nga maka-agto sa vaccination site.
Ro in-charge suno kana nga midwife sa sangka barangay ro naga-agto sa baeay it senior citizen ukon PWD agud nga mabakunahan.
Gindugang pa ni Laserna nga pagkatapos it mga market vendors hay igasunod ro public transport depende sa availability it bakuna.
Handum sigon nanda nga padayon ro pag abot it maabu nga mga bakuna agud nga sigidas man ro andang vaccination roll-out.
Nagpanawagan man raya sa publiko nga indi magpili it bakuna bangud nga ro anuman nga covid vaccine nga available hay siguradong makatau it proteksyon.
