KALIBO, Aklan— Kabilugan nga 142 nga mga maisot nga pawikan ro natigayon nga ginbuhian paagto sa dagat sa isla it Boracay.
Suno kay Haron Deo Vargas, marine biologist it LGU-malay nga raya ro ikaywang beses nga nag-release sanda it mga pawikan hatchlings umpisa nga ginbuksan it uman ro Boracay ko Oktubre matapos ro an-um nga buean nga rehabilitasyon.
Raya hay nagapamatuod suno kana nga eubusan eon nga malimpyo ro tubi sa isla bangud sa pagpanumbalik it mga pawikan sa andang ginapangitlugan.
Ko Pebrero 1, 2019 , kapin sa 79 nga mga maintok nga pawikan ro nakit-an it mga empleyado it sangka resort sa prente it andang establisimento nga insigida man nga gin-report sa LGU-malay nga kon sa siin pagka-aga hay ginbuhian sa dagat sa may parte it Sitio Tambisaan, Barangay Manoc-manoc sa nasambitang isla.
Samtang, ko Pebrero 7, kapin sa 63 man nga mga hatchlings ro ginbalik sa dagat sa parte it Bayugan beach sa Barangay Yapak.
Ginpahayag ni Vargas nga ro nasambit nga memorable events hay matiyaga nga ginbantayan it mga residente ag mga turista.
Samtang, nagaeaum ro Department of Environment and Natural Resources ukon DENR Region VI nga magabueuligan ro tanan agud nga maprotektahan ro mga pawikan sa isla.
