Masobra sa 150,000 heaga it nagkaeain-eain nga frozen products ro nakumpiska sa sangka negosyante sa may bahin it Oyo Torong St. Kalibo.
Raya hay matapos nga uwa it pangaean ukon label ro mga produkto nga hugot nga ginabawaean base man sa ginpaguwa nga mandato it gobyerno probinsyal bilang pagdahan sa ginakahadlukan nga African Swine Fever ukon ASF nga nagpanaeasa sa ibang mga probinsya.
Suno kay Municipal Agricultural Officer Mr. Uriel Las Piñas it LGU Kalibo nga ro nasambit nga negosyante hay nauna eon man nga nadakpan sa kaparehong pag-eabag.
Ginabaligya sigon nana online ro mga produkto kon sa siin nadakpan raya sa entrapment operation nga ginpatigayon it Office of the Provincial Veterinarian kaibahan ro iba pang natungdan nga ahensya it gobyerno.
Madumduman nga agud nga mapabilin nga eowas sa African Swine Fever ukon ASF ro probinsya it Aklan, ginpaguwa ni Governor Joen Miraflores ro executive order number 021 series of 2023 nga naga-amyendahan sa executive order number 016 2023 kon sa siin ginpatuman ro total nga pagbawae sa tanan nga klase it buhi nga baboy, karne ukon mga produkto nga may karne it baboy nga makasueod sa probinsya it Aklan maghalin sa mga ASF-infected territories ag sa tanan nga mga probinsya sa Pilipinas.
