Naka-deploy eon ro kabilugang 1,720 personnel maghalin sa Philippine National Police (PNP), Philippine Coast Guard (PCG) ag Armed Forces of the Philippines (AFP) agud nga magtao it seguridad sa ika-44 nga ASEAN Capital Markets Forum (ACMF) Chairs Meeting nga nag-umpisa adlaw it Martes, Marso 24 ag magatapos sa Marso 27, 2026.
Suno kay PMSgt. Jane Vega, tagapaghambae it Aklan Police Provincial Office, kabulig man kara ro 528 nga miyembro it Sub-Site Task Group on Emergency Preparedness and Response.
Tuyo it nasambit nga deployment nga mapabilin ro kalinungan, kaayusan, ag kaeowasan it international delegates ag mga bisita sa ginapatigayon nga forum.
Una kara, nakaangkon it pre-deployment preparations ko Marso 23, adlaw it Lunes sa Argao Covered Court sa Barangay Argao, Malay kon sa siin gintalakay ro kahauman sa operasyon, saeabton it kada unit ag ro maayos nga koordinasyon it tanan nga gintaeanang puwersa para sa forum.
Samtang sa pihak nga parte, ginpatuman it PNP ro temporaryong suspension it Permit to Carry Firearms Outside of Residence (PTCFOR) sa isla it Boracay halin ko Marso 21, alas-12:01 it tungang gabie hasta sa Marso 28 it 11:59 it gabie bilang kaparte it seguridad sa 2026 ASEAN Meetings.
Tuyo it waeong adlaw nga pagbawae ro pagpabilin it kalinungan ag kaeowasan it publiko sa tyempo it nasambit nga internasyonal nga pagtililipon.
Mismong ro mga miyembro it PNP, AFP, ag iba pang law enforcement agencies nga naka-duty ag naka-uniporme ro ginapasugtan nga magdaea it baril.
Angot kara, nagpanawagan ro PNP sa publiko it kooperasyon agud masiguro ro eowas ag maayos nga pagpatigayon it ASEAN 2026.
