KALIBO, Aklan—Masobra sa 20 porsyento pa eamang it kabilugang populasyon it banwa it Tangalan ro nabakunahan kontra sa covid-19.
Raya hay suno kay Tangalan Mayor Garry Fuentes kon sa siin ko una sigon hay haeos sang beses sa sang dominggo ukon daywang beses eamang sa sang buean ro andang vaccination roll out sa mga pumueoyo nga una sa priority list.
Apang halin ko buean it Oktobre hay nagtaas eon ro numero it andang mga nabakunahan nga nagaabot sa 500-600 jabs ro andang napatigayon kada may roll out.
May kahigayunan sigon nga sa sueod it sang dominggo hay tatlong beses ro vaccination sa anda nga banwa kasunod it pag-aeabutan it supply it bakuna sa probinsya it Aklan.
Sa raya nga tikang nga hay nagaeaum ro alkalde nga mapataas pa ro porsyento it mga mabakunahan kontra sa covid-19 sa andang banwa.
Sa makaron suno kay mayor Fuentes hay nagabaton eon sanda it walk-in vaccine agud nga mabakunahan eon kontra sa covid-19 ro mga interesadong pumueoyo.
May kaangtanan kara, gin-engganyo ni alkalde ro anang mga nasakupan nga makipagbahin sa maeapnagon nga bakunahan kontra sa deadly virus agud nga maangkon eon ro target nga herd immunity it nasyon.
