KALIBO, Aklan—Masobra sa 201,000 ro nailistang tourist arrival it Malay Tourism Office ko buean it Mayo sa isla it Boracay.
Sa ginpaguwa nga datos it taeatapan, kapin sa 201,368 ro mga turistang nagbisita sa isla kon ikumpara ko buean it Abril nga umabot eamang sa numero nga 186,751.
Mayorya sa mga bakasyunista hay domestic tourists nga nakalista it 193,298.
Samtang, ro Overseas Filipino Workers ag Overseas Filipinos hay kapin sa 3,802 kamana man ro foreign tourists hay nagaabot sa 4,268.
Ro tourist arrival it Abril ag Mayo hay naka- surpassed sa pre-pandemic records it Boracay kon siin senyales sigon raya nga nagbalik eon sa normal ro industriya it turismo sa ginakabig nga tourism crown jewel it nasyon.
Madumduman nga antes ro lockdown ko Marso 2020, nakalista it haeos 167,070 nga tourist arrival sa Boracay.
Ginaeauman eon man makaron nga dag-on ro pagdagsa it mga dumueoong turista kasunod it pag-anunsyo it Civil Avaition Authority of the Philippines ukon CAAP Aklan nga nagbalik eon sa 24/7 ro operasyon it Kalibo International Airport halin ko Hunyo 1 it presenteng dag-on.
