KALIBO, Aklan—Nag-uli nga may trabaho eon ro 328 nga mga jobseekers matapos nga na-hire on-the-spot sa job fairs nga ginpatigayon sa bilog nga Western Visayas ko nagtaliwan nga selebrasyon it Labor Day, Mayo 1 sa nagkaeain-eain nga venue.
Sa nasambit nga numero, 55 ro naghalin sa Aklan, 12 ro halin sa Antique, 41 ro sa Capiz, 25 halin sa Guimaras, 66 ro sa Iloilo, ag 129 ro naghalin sa Negros Occidental.
Nasayuran nga gin-organisa it Department of Labor and Employment (DOLE) ro nasambit job fairs.
Pila sa mga posisyon nga napuno hay ro sales associates, staff nurses, Information Technology specialists, clerks, cashiers, baggers, customer service representatives, waiters, service crew members, ag promodizers.
Dugang pa kara, 55 sa jobseekers ro na-recruit para sa Government Internship Program, kun sa siin pagasuportaran sanda it DOLE nga magtrabaho sa public sector sa sueod it tatlo hasta an-um nga buean para sa sweldo nga P480 kada adlaw.
Ro madinalag-on nga mga indibidwal hay kaibahan sa masobra sa 5, 000 nga mga jobseekers nga na-interview sa nasambit nga job fairs.
