Masobra sa 3K nga mga residente sa Japan, ginmanduan nga magbakwit bangud sa maeapnagon nga wildfire

Naga-abot eon sa masobra 3,000 nga katawo sa northern Japan ro ginmanduan nga mag-evacuate ukon maghalin anay sa andang mga baeay matapos mag-eontad ro wildfires, adlaw it Miyerkules, April 22, 2026.

Gin-abisuhan ro mga residente sa Otsuchi, Iwate Prefecture, nga magpaeayo bangud una eon sa masobra 1,176 hectares it kagueangan ro nasunog.

Nahalitan man ro pilang mga buildings sa rural area suno kay Japan’s Chief Cabinet Secretary Minoru Kihara.

Ko nagtaliwan nga dag-on, natabu sa Iwate ro pinakamabahoe nga forest fires sa Japan sa sueod it pilang dekada.

Nasunog kara ro haeos 3,000 hectares it eugta ag nagresulta sa pag-evacuate it masobra sa 4,000 nga katawo.