KALIBO, Aklan — Halin kabi-e it Lunes hay suspendido eon ro direct flights halin sa Wuhan, China paadto sa Kalibo International Airport.
Suno kay Civil Aviation Authority of the Philippines (CAAP)-Aklan manager Engr. Eusebio Monserate Jr., raya hay matapos nga nakauli eon sa Wuhan ro masobra sa 500 Chinese tourists nga nagbakasyon sa isla it Boracay.
Daywang airline companies nga may direct flight sa nasambitang syudad ro nagsueang sa mga raya sa ap-at nga batches nga nag-umpisa ko adlaw it Huwebes ag kabi-e ro pinakaulihi.
Samtang, ginkumpirma ni Engr. Monserate nga nagapadayon ro direct flights sa paeoparan it Kalibo halin sa iba pang bahin it China.
Sa pihak kara, hugot ro pagbantay nga ginahimo it Bureau of Quarantine sa mga nagasueod nga pasahero sa paeoparan.
Sa makaron hay nagapabilin nga N-CoV free ro Aklan kon sa siin, tatlo sa 27 nga ginabantayang dumueoong sa nasyon nga ginakabig nga persons under investigation hay nakaguwa eon sa Aklan Provincial Hospital.
