KALIBO, Aklan — Kabilugan nga sa 5,644 nga mga Akeanon ro naeakip sa kabilugan nga 53,342 nga 4Ps households nga makabaton it retroactive payment sa bilog nga Region 6.
Raya ro ginkumpirma ni Atty. Mae Rago Castillo, Regional Information Officer it Deparment of Social Welfare and Development (DSWD) Field Office 6 sa interview it Bombo Radyo Kalibo.
Ro mga makabaton sigon kara hay ro mga 4Ps beneficiaries nga gin-hold ro andang cash grant bangud sa initial findings nga sanda hay non-poor.
Suno kay Atty. Castillo nga bangud sa pag-agi it pandemya, nakit-an sa resulta it Social Welfare and Development Indicators (SWIDI) nga nagakinahangean pa ro mga raya it bulig rason nga kinahangean pa nanda nga magpabilin sa programa.
Ro first batch nga nakabatun eon it retroactive payment pinaagi sa andang cash card hay naga-abot sa 48,638 households nga may kabilugan nga P31.7 milyon nga pondo nga ginpatigayon ko Agosto 14.
Ro second batch hay 4,694 households nga nakataeana nga magabaton it cash grant, ag ro third batch hay 10 households.
Nagkaeain-eain nga kantidad sigon ro mabaton it mga beneficiaries bangud nga raya hay nakadepende kon kan-o sanda gin-hold ag kon pila ro andang unga.
Pagkatapos sigon nga uman nga ginbalik sa listahan regular eon man sanda nga makabaton it ayuda.
Sa pihak nga parte, apela ni Atty. Castillo sa mga benepisyaryo nga gamiton ro nabaton nga kwarta para sa kinahangeanon it andang mga unga para sa ikamayad nga eawas ag edukasyon.
