KALIBO, Aklan—Masobra sa P2 milyon pesos ro nadueang income sa Municipal Economic Enterprise Development Office ukon MEEDO makaron nga dag-on sa selebrasyon it Kalibo Ati-atihan Festival 2021.
Raya hay kasunod ko maeapnagong epekto it Covid-19 pandemic nga nagparalisa it maabong negosyo, selebrasyon, aktibidad ag maging ro kasadyahan.// suno kay MEEDO Kalibo head Jessie Fegarido, “zero” balance makaron ro andang taeatapan bangud nga uwa it maboe-an it revenue matapos nga ginkansela ro dag-unang selebrasyon it Ati-atihan festival.
Kada dag-on suno kana hay uwa naganaba sa P2 milyon pesos ro andang kita sa sueod it sang dominggong selebrasyon maghalin sa entrance fee sa Magsaysay park, sa mga flea market ag iba pang temporaryong negosyo nga nagabayad it renta sa munisipyo.
Ro ginpadayon nga Mutya it Kalibo 2021 nga nakataeana hinduna it gabie ro coronation night hay gin-usuyan nanda raya it sponsor rason nga na-maximize ro gastos it lokal nga gobyerno.
Uwa eon suno kana haeos it gastos ro LGU bangud nga ginsabat raya it mga sponsors nga uwa gid kanda nagbalibad sa tunga it kalugihan nga naeksperyensyahan tuga it pandemya nga daea it deadly virus.
Ro ginakabig nga Mother of All Philippine Festivals hay uwa it street dancing ukon merry making nga maeksperyensyahan makaron nga dag-on sa unang kahigayunan halin sa maabong dinag-on nga ginaselebrar raya sa banwa it Kalibo bangud sa pandemya.
Apang, padayon ro aktibidad it simbahan partikular it St. Jhon the Baptist Cathedral mag-eowas sa nakaangdan nga paeapak in honor sa patron saint nga si Sr. Sto. Niño de Kalibo.
