KALIBO, Aklan—Ginaboeobanta nga P20,000 pesos nga balor it shabu ro nabo-oe it mga operatiba it Malay Municipal Police Station halin sa sangka habal-habal driver nga nadakpan sa ginkasa nga buy-bust operation sa Sitio Cagban Ibabaw, Brgy. Manocmanoc, Boracay.
Nakilaea ro suspek nga si John Joseph Luces Castro, 26-anyos, residente it Brgy. Solido, Nabas ag temporaryong naga-istar sa nasambit nga lugar.
Ginlunsar ro operasyon it mga kapulisan nga nagresulta sa insigidang pagka-aresto sa suspek matapos nga makatransaksyon ag makabakae it droga ro nagpakuno-kuno nga poseur buyer.
Nakumpiska kay Castro ro kapin sa 3 gramo it ginadudahan nga shabu nga may standard drug price nga P20,400 pesos, iba pang mga gamit ag buy-bust money.
Mabuhay eon nga under-surveillance ro suspek ag masyadong maila sa mga otoridad.
Ro mga daeagkuan eamang sigon nga transaksyon ro anang ginakagat ag target kara nga customer ro anang mga pasahero eabi eon ro mga dumueu-ong nga turista.
Magapangatubang sa reklamong pag-eabag sa R.A. 9165 ukon Comprehensive Dangerous Drug Act of 2002 ro suspek.
