KALIBO, Aklan—Ginaboeobanta nga kapin sa P4 million pesos ro kantidad it mga propiyedad nga nahalitan sa pagkasunog it sangka rest house sa Brgy. Polo, New Washington, kaina it bandang alas-12:30 it aga-aga.
Suno sa Bureau of Fire Protection ukon BFP New Washington nga hasta sa makaron hay gina imbestigahan pa ro ginhalinan it sunog nga nagpa-ugdaw sa haeos 300 square meters nga kaeaparon it rest house nga ginapanag iyahan ni Mr. Reynato Prado Ambrocio.
Sa interview it Bombo Radyo, ginpahayag ni Lazaro Ledesma, kaeapitbaeay ag nakasaksi sa insidente nga pagkatapos nga magkilat it mabaskog hay nagpangayo kana it bulig ro caretaker it rest house nga si Jerome Permino bangud sa pagtuhaw it sunog.
Rumesponde sa insidente ro fire truck it BFP New Washington ag Kalibo.
Ginasugid nga naghalin sa masters bedroom ro kaeayo nga owa eagi nabuksan bangud nga naka lock.
Maskin nga mauean, apang madasig nga nagkalhit ro kaeayo bangud nga himo sa pawod ro anang bungbungan ag ginpatungan eamang it color roof kamana man nga himo sa amakan ro pilang parte kara.
Haeos ap-at nga oras ro ginhimo nga fire fighting antes nga gindeklara ro fire out.
Sa mayad nga swerte ag owa man it naninahan sa natabu nga sunog.
