KALIBO, Aklan— Masobra sa sang milyon nga mga pasahero ro bumuhos sa mga pantalan sa bilog nga Western Visayas umpisa ko Abril 2 hasta 11, 2023.
Raya ro ginpahayag ni Lt. Commander Jansen Benjamin, tagpaghambae it Philippine Coast Guard ukon PCG-Western Visayas.
Kaeabanan sa mga pasahero hay nagabakasyon, nagabisita sa andang mga igbata ag naga-agto sa mga pilgrimage sites para sa Semana Santa ag long weekend.
Base sa record it PCG-6, nakalista it outbound passengers sa nasambit nga period sa 458,567 ag 563,320 ro inbound travelers sa tanan nga pantalan sa Region 6.
Suno pa kay Commander Benjamin nga ro Aklan ro nakalista it pinakamataas nga numero it mga pasahero nga may 170,198 nga outbound ag 160,796 ro inbound nga kaabuan hay nagsueod ag nagguwa sa isla it Boracay.
Kamana man ro mga pasahero it Roro Vessel nga nag agi sa Caticlan Jetty Port.
Nagdugang sigon ro PCG it mga tawuhan nga nauna eon nga ginpaidaeum sa heightened alert agud nga mabantayan ro pagbuhos it mga pasahero ag maga-inspection sa mga pampasaherong barko ag motorbanca.
Sa pihak nga parte, ginkumpirma ni Commander Benjamin nga pangkabilugan nga naging matawhay ro biyahe it mga saeakyang pang-eawod ko tiempo it Semana Santa sa bilog nga Western Visayas kun sa siin owa it anuman nga nailistang untoward incident mag-eowas sa pagkabunggo it speed boat it sangka Hotel sa sangka baroto nga nagresulta sa kamatayon it 60-anyos nga Ati Chieftain sa Boracay nga si Ernesto Coching.
Nakalista man sanda it sangka insidente it pagkaeumos ag daywa ro near drowning sa bilog nga region 6.
