BUSINESS News– Nagaeaum ro senado nga masobra sa ₱17 billion pesos sa sang dag-on ro kita nga makolekta it gobyerno kon maging laye ag mapatuman eon ro pagpatong it 12% value added tax (VAT) sa mga digital service transaction kapareho it mga foreign streaming platform ag e-commerce apps.
Suno kay Senate Committee on Ways and Means Chairman Senator Sherwin Gatchalian nga base sa pagboebanta it Bureau of Internal Revenue (BIR) nga 70% collection efficiency, naga abot sa ₱17.6 billion pesos ro dugang nga kita nga makolekta sa buwis kon maumpisahan nga masukot ro mga digital service provider.
Kmpiyansa ro senador nga masobra pa kara ro makolekta it gobyerno bangud posibleng maabu ro magparehistro para maging ligal ag mapadayun ro andang online services sa nasyon.
Pagklaru ni Gatchalian, ro pagbayad it buwis it mga digital ukon online service providers hay bukon eon it bag-o sa nasyon bangud ro mga domestic companies nga naga-operate kapareho it VivaMax, iWant TV, GCash, Maya ag iba pa hay nagabayad it 12% VAT.
Ginpamilit ni Gatchalian nga bukon it tama nga ro mga digital companies sa nasyon hay nagabayad it buwis sa gobyerno para ligal nga makapag-operate apang ro mga foreign digital services kapareho it Netflix, Amazon, YouTube, Alipay, WeChat ag iba pa hay nakakalibre.
Sa ginpatigayon nga konsultasyon ni Gatchalian, pabor sigon ro mga korporasyon nga magbayad it VAT ag magsunod sa laye it nasyon.
Gintumod pa it senador nga sa 11 nga nasyon sa ASEAN, pito eon kara ro may ginapatuman nga sistema nga pagpanukot it VAT sa mga digital service transaction.
