KALIBO, Aklan—Ginpamalibaran it sangka overseas Filipino worker (OFW) sa New Delhi, India ro napabalita nga maskin sa kalye hay nagapatigayon eon it mass cremation bangud sa kaabuon it mga namatay sa Coronavirus Disease 2019 (Covid-19).
Suno kay Bombo International Correspondent Zenaida Rizaldo, technical manager it sangka garment factory nga maskin ginatos kalibu kada adlaw ro nagakamatay hay ginataw-an gihapon raya it nagakaigo nga pag-respeto it andang natungdan nga pamilya.
Bangud nga indi eon masarangan it mga crematorium hay nagtukod ro Indian government it crematorium ground kun sa siin kaibahan kara ro mga parking lots nga gin convert nga crematoriums nga ginagamitan it mga kahoy ag papel sa pagsunog sa bangkay.
Samtang, maskin suno kana ro gobyerno hay owa nagaeaum sa andang sitwasyun makaron sa pagsirit it covid infections ag mga nagakamatay.
Aminado man imaw nga bangud sa ginpatigayon nga maabu nga festivals nga naging tradisyon eon it mga pumueuyu ro rason it surge it kaso it covid.
Mag-eowas pa sa magsueod it mga nagkaeain-eain nga variants it covid sa nasambit nga nasyon.
Pagpatigayon it eleksyon ag magarbong mga kasae kamana man ro pagiging kampante it mga tawo bangud sa ginturok nga bakuna nga unang na produce it India.
Samtang, gindugang pa ni Rizaldo nga haeos gina-expect eon it mga Pinoy sa nasambit nga nasyon ro worst-case scenario.
Mag-eowas sa koeba hay nabudlayan eon sigon sanda sa andang sitwasyun kun sa siin maabu kanda ro gusto eon nga mag uli sa Pilipinas nga imposible pa nga matabu makaron.
Nagabueuligan sigon ro Filipino community sa India ag kaibahan sa andang gin-ayudahan hay ro daywang Filipino nga namatay sa nasambit nga deadly virus kamana man ro iba pa nga infected ag naka-isolate makaron.
Agud nga haeungan ro andang mga kaugalingon, owa sigon sanda nagaguwa it andang baeay ag naga-order eon lang online sa andang mga kinahangeanon.
