KALIBO, Aklan—Nagapabilin nga mataas ro numero it mass shooting ag gun violence sa Amerika.
Raya ro ginkumpirma ni Bombo International Correspondent Greg Aguilar it California, USA kasunod it pilang ka mga insidente nga ginkamatay it maabu nga pumueoyo.
Suno kay Aguilar, mabudlay nga makontrol ro pag-angkon it firearms bangud sa nagak-eksister nga US constitution.
Mas pa sigon nga nag-abu ro mga pumueoyo nga nagahupot it armas umpisa nga magtuhaw it COVID-19 pandemic.
Nasayuran nga nagkaeain-eain nga patakaran ro ginapatuman sa kada estado it Amerika pag-abot sa pagbakae ukon pag-angkon it baril.
Mas madali sigon ro pagbakae it armalite kaysa sa hand gun kung siin ginapasugtan ro pagbaligya kara sa mga indibidwal nga naga-edad it 18-anyos.
Madumduman nga napunggan it sangka female party-goer ro posibleng dugang nga insidente it mass shooting sa Amerika ko nagtaliwan nga adlaw.
Raya hay matapos nga ginbaril-patay kara ro sangka eaeaki nga gulping nagpauean it mga bala sa public area gamit ro semi-automatic rifle.
Target kunta it suspek nga barilon ro grupo it 30 hasta 40 katawo sa Charleston, West Virginia.
