KALIBO, Aklan—Makabig nga sangka seryoso nga problema sa Estados Unidos ro nagakatabu nga mass shootings.
Suno kay Bombo International Correspondent Gabriel Pedregoza it California nga naga-abot eon sa 68 ro nailistang mass shooting sa amerika sa nagtaliwan nga daywang buean.
Ro pinaka-ulihi sigon kara nga insidente hay natabu ko nagtaliwan nga adlaw sa san jose california nga ginkamatay it siyam nga katawo eakip ro gunman nga puro nagatrabaho bilang transit worker sa Santa Clara Valley Transportation Authority ukon VTA facility.
Nasayuran nga sambilog sa mga namatay hay sangka Pinoy.
Ro insidente hay padayun pa nga gina-imbestigahan it mga otoridad.
Ginakabig sigon nga mass shooting ro natabu kon ro numero it mga namatay hay naga abot sa ap-at nga katawo pataas.
Bangud kara, uman suno kana nga nabukaran ro isyu angot sa gun control nga sambilog sa mga ginaturo nga rason it pagtuhaw it mga mass shooting.
Samtang, gindugang pa ni Pedregoza nga bangud sa maeapnagon nga insidente it hate crime sa US, todo alerto makaron ro mga Asyano.
Mabahoe nga bulig sigon ro bag-o eamang ginpirmahan ni president joe biden nga covid-19 asian hate crime law.
