KALIBO, Aklan—Agud nga mas pang masuk-ean ro pagkalhit it virus sa mga residente, ginpakamayad nga magapatigayon it mass testing para sa coronavirus disease 2019 (COVID-19) sa tanan nga mga naga-istar sa Purok 1, C. Laserna St. Kalibo.
Suno kay Aklan Governor Florencio Miraflores nga raya ro sambilog sa mga rekomendasyon sa ginpatawag nga pueong it Provincial Inter-Agency Task Force ko nagtaliwan nga adlaw.
Ginpasiguro man sigon kana it mga doktor nga masarangan it molecular laboratory it Aklan provincial hospital ro 500 hasta 600 nga swab tests.
Pagakabuligan man suno kana it gobyerno probinsiyal ag ko lokal nga gobyerno it Kalibo ro distribusyon it food packs sa mga apektadong residente, kun sa siin, nauna eon nga ginpaidaeum ro bilog nga purok sa lockdown ko Nobyembre 20.
Ginmandu man it gobernador nga ro tanan nga may positibong kaso hay ibutang sa ligtas covid center kamana man ro mga high risk contacts kon may mabutangan pa.
Madumduman nga pilang residente halin sa nasambit nga lugar ro nagpositibo sa sakit matapos nga makaangkon it close contact sa 43- anyos nga babaye nga namatay ko November 16 bangud sa sakit sa kidney sa Aklan provincial hospital ag nagpositibo sa makamaeatay nga virus sa ginpatigayon nga swab test.
Gindugang pa ni governor Miraflores nga ginatutukan nanda ro insidente bangud nga maka-alarma eon ro nagatinaas nga kaso it local transmission.
Uman raya nga nagpanawagan sa publiko nga sundon ro mga health protocols eabi eon sa C. Laserna area agud nga masuk-ean ro coronavirus.
Sa pinaka-ulihi nga listahan it Provincial Health Office, ro Kalibo hay may 117 nga kaso it COVID-19, kun sa siin 84 ro nagmayad eon; 24 ro naka-facility quarantine ag sambilog ro naka-admit sa ospital.
Nagapabilin nga waeo ro namatay sa nasambit nga sakit.
