KALIBO, Aklan—Ginpamilit ni Kalibo Liga ng mga Barangay President Ronald Marte nga mas importante nga matutukan ro massive vaccination kaysa sa mass testing.
Raya hay kasunod it gindihon nga resolusyon ni Sangguniang Bayan member Buen Joy villanueva-french nga nagaproponer nga iduso eon ro mass testing sa munisipyo it Kalibo bangud sa nagatinaas nga numero it mga empleyado nga nagpositibo sa COVID-19.
Nagapati si Marte nga indi pa kinahangean ro mass testing bangud nga manageable pa ro sitwasyon.
Posible suno kana nga madaeahig ro ibang empleyado kaibahan ro andang mga pamilya nga owa it close contact sa mga nagpositibong staff bangud sa iga-require nga isolation sa sueod it 14 diyas.
Nagdihon eon sigon imaw it resolusyon angot sa pagpatigayon it massive vaccination sa tanan nga mga trabahador, mapa-gobyerno man ukon pribadong sector agud nga makaangkon it nagakaigo nga proteksyon ag malikawan eon ro pagtaeapnan it virus.
Ginsuhestiyon man nana nga makaangkon it orientation ro mga empleyado it kada departamento angot sa minimum health protocols partikular ro pagginuwa sa andang departamento kon bukon man lang it importante ro panaw.
Kamana man nga hugut nga pagpatuman it physical distancing eabi eon kada lunch break ag ro pagsuksok it face mask sa tanan nga oras sa sueod it workplace.
Ginrekomendar man nana nga kada biyernes nga adlaw hay isarado anay ro sangka opisina agud nga magpatigayon it disinfection ag butangan it distansiya ro kada lamesa.
Kadungan kara, nag apela imaw sa mga empleyado nga engkaso nga mag-abot ro andang tiempo hay i-avail ro bakuna para kanda.
