KALIBO, Aklan—Pilang adlaw antes ro US elections sa Nobyembre 3, masyadong dukot ro engkwentruhanay sa pagkapangueo sa tunga ni US president Donald Trump ag Democratic presidential nominee Joe Biden.
Suno kay North Carolina (carolayna) international correspondent Liza Ureta Castelvecchi , tubong banwa it numancia ag presenteng naga-istar sa nasambit nga estado nga kaeabanan sa mga balita ag poll survey hay liyamado si Biden, apang sa mga ginapatigayon nga rally hay maabu ro nagatambong ag nagasuporta kay Trump rason nga medyu mabudlay pa nga ma-predict kon sin-o sa daywa ro magapangibabaw.
Gindugang pa kara nga maabu man nga mga residente it north Carolina ro nakaboto eon pinaagi sa early voting ag vote by mail.
Nagabakaeaka man sigon makaron ro maabu nga mga amerikano nga makaangkon it dayaan ro vote by mail eabi eon ro mga supporters ni trump bangud nga posibleng sa post office pa eamang hay mabasura ukon maduea ro anang boto.
Gindugang pa ni liza nga maabu nga mga pumueuyu it US ro nagpatigayon it vote by mail bangud sa padayun nga paeag it coronavirus disease ukon covid 19.
Madali eamang sigon ro pagboto sa US bangud nga makabig nga sistematiko ro andang eleksyon.
Sa mga polling precints hay hugut nga ginapatuman ro social distancing ag pagsuksok it face mask.
Tanan nga 50 nga estado sa US eakip ro District of Columbia ro nagapahaum eon sa eleksyon.
Ro North Carolina hay may 15 nga electoral votes sa Electoral College.
