Kalibo Aklan———–Ginakabig nga sangka hangkat it Department of Health (DOH) ro masyadong manaba nga vaccination roll out it booster shot it covid-19 vaccine sa bilog nga nasyon.
Suno kay J-Lorenz Dionesio Nurse 111 it PHO- Aklan ag COVID-19 vaccination manager nga sa makarun hay padayun ro andang ginahimo nga tikang agud nga ma-enggayo ro mas maabo pang mga pomoeuyo nga magpaturok it booster shot.
Sa probinsya it Aklan hay naga-abot eamang sigon sa 10.85 percent ro mga numero it mga nakabatun eun it andang booster shot it covid-19 vaccine.
Masyado sigon rayang manaba kung igakumpara sa 492, 000 nga target nga mabakunahan sa probinsya.
Samtang, matapos man sigon nga ginpaidaeum sa Alert Level 1 ro Aklan ag ginhaeugaan ro mga pagsinueondan hay naga-abot eun lang it 100 hata 200 ro mga nagapabakuna it andang 1st ag 2nd dose it covid-19 vaccine kada adlaw nga mas manaba sa dating nailista nga 500-1000 kada adlaw.
Sa makarun hay nagapadayun sigon ro ginapatigayon nga vaccination sa probinsya sa gintaeana nga vaccination area sa Aklan Catholic College.
Makarun nga adlaw hay may mga bakuna nga nakataeana para sa naga-edad 5 hasta 11 anyos ag raya hay bukas para sa walk in ag sa mga nauna eun nga nagparehistro.
Samtang hin-aga nga adlaw it Huwebes hay may schedule man it booster shot kamana man sa 1st ag 2nd dose.
Sa masunod nga dominggo hay pagabisitahon man sigon nanda ro kada banwa nga may mahina nga vaccination roll out .
Una nanda nga paga-adtunan hay ro banwa it Libacao nga sambilog sa mga may manaba nga roll out it bakuna.
May kaangtanan kara, gina-enggayo man it PHO-Aklan ro mga opisina ag nagkaeain eain nga ahensiya it pribado ag pampublikong teatapan nga magpatuman it polisiya agud nga obligahon ro andang mga empleyado nga magpaturok it booster shot agud nga maakangkon it dugang nga proteksiyon kontra sa naga-eapta nga virus.
