Business News ——-Nagguwa sa ginpatigayong market study it Department of Trade and Industry (DTI) nga ro butong, calamansi, carrageenan, ag moringa hay may may mataas nga export potential sa European markets.
Kaibahan eon kara ro ube, turmeric, butterfly pea flower ag elemi tree.
Suno sa DTI, ro mataas nga demand sa mga nasambitang produkto hay bangud sa healthy lifestyle choices ag paggamit it natural ingredients sa paghimo it cosmetics ag mga bueong.
Bangud kara, nagpanawagan si DTI Usec. Abdulgani Macatoman sa tanan nga mga Philippine producers it mga nasambit nga natural ingredients nga umpisahan eon ro pag-export kara sa Europe.
Nakahaom sigon sanda nga alalayan it DTI-Export Marketing Bureau (EMB) para maging export-ready ag kumonekta sa mga foreign buyers.
Ro pagtuon nga may titueong “Marketing Intelligence EFTA for the Philippines” hay ginpatigayon it Swiss Import Promotion Program (SIPPO), kabulig ro DTI-EMB ag embahada it Switzerland sa Pilipinas.
Gin-usisa sa nasambit nga pag-istudyo ro viability it Philippine textiles, natural ingredients ag processed food para sa European market, eabi eon sa European Free Trade Association (EFTA) sa mga nasyon kaparehas it Iceland, Liechtenstein, Norway ag Switzerland.
Suno pa kay Macatoman, may ginpirmahan eon nga free trade agreement sa tunga it Pilipinas ag EFTA nga naging epektibo halin ko 2020.
