KALIBO, Aklan—Inde makabulig sa mga mangunguma maskin nga panabaon pa ro taripa sa produktong agrikultura.
Raya ro reaksyon ni Lucia Capaducio, chairperson it Paghugpong sang mga Mangunguma sa Panay kag Guimaras ukon Pamanggas-Panay kasunod it nagapadayon nga problema it mga mangunguma eabi eon sa mataas nga presyo it abono ag pestisidyo kamana man ro kawad-an it ayuda it gobyerno sa mga raya.
Mag-eowas kara, sunod-sunod ro importasyon it mga produktong agrikultura nga raya ro eubus nga nagapalugmok sa mga ultimo nga tawo.
Tuman ka insulto sa mga Pilipino ro tikang nga ginahimo makaron it gobyerno bangud nga maskin isda hay ginaimport pa sa ibang nasyon.
Nauna eon nga ginpaeawig ni Pangueong Ferdinand Marcos Jr ro temporaryong pagpanaba it taripa sa mga nagkaeain-eain nga klase it produkto para mapabilin ro abot-kayang presyo ag masiguro ro suplay it mga produktong agrikultura.
Pirmado it Presidente ro Executive Order 10 ko Disyembre 29 nga ro mga karne it baboy, fresh, chilled o frozen, maize, rice ag coal hay dapat mataw-an it Most Favored Nation (MFN) rates on duty.
Nakabaehag sa nasambit nga mandato nga importante ro nasambit nga pagpaeawig sa pagbuhin it taripa para makabulig sa mga tawo bangud sa pagtaas it pilang presyo it baeak-eon.
