Pilang domingo eon lang ag magabalik eskwela eon.
Kadungan kara, nagapabilin sa gihapon ro panawagan it grupo it mga manugturo para sa andlang mga kinahangeanon.
Gina apela nanda ro tatlong nagapangunang kinahangean it manugturo para sa komportable ag maayos nga pagturo.
Una hay ro pagpataas it sweldo nga padayun nanda nga ginapakigsukoe ag dapat eon nga mataw-an it atensyon.
Paalin matuod nga makasueod sa eskwelahan ag makaturo ro titser nga kapos sa pinansyal?
Ikaywa hay ro ginatawag nga logistics ukon kagamitang dapat ginatau sa mga manugturo kapareho it bastanteng teaching materials, halimbawa ro mga computers, laptops ag maabu nga iba pa.
Sa idaeum it blended learning, mas napamatud-an nga maabu nga kakueangan sa mga gamit sa pagturo sa bilog nga nasyon.
May kahigayunan pa nga nagahalin eon sa kaugalingon nga boesa it mga manugturo ro ginagastos nga pangbakae it materyales ukon pangbayad sa internet sa distance learning.
Ikatlo hay ro mabawasan ro andang paperworks nga dugang nga pasakit sa mga titser nga eampas sa 12-oras nga nagatrabaho bangud sa kaabuon it oeobrahon nga dapat nga mataw-an it aksyon.
Ro trabaho it titser hay owa natapos sa ap-at nga kanto it classroom, anda pa raya nga gina-uli sa baeay.
Kabay nga pamatian it bag-ong pamunuan it Department of Education ro nasambit nga mga panawagan, eabi eon ro pagpataas it sweldo , bastante nga kagamitan sa pagturo ag bawas-paperworks.
Kabay nga boe-on eon ro mga mabug-at nga paeas-anon sa atong mga manugturo.
Maswerte kita nga sa pihak it gaoy hay nahimo gihapon nanda nga mag-atubang sa mga estudyante nga puno it kabaskog ag maayos nga napatigayon ro edukasyon.
Kabay nga indi eon paghueaton pa nga eubusan sanda nga umatras.
Buligan naton ro atong mga manugturo , obrahon nga maugan ro andang pagturo ag pagpangabuhi bangud nga kaparte man sanda sa pagbilog it mga handum it pamatan-on nga buwasdamlag it nasyon.
