KALIBO, Aklan–Matapos pormal nga mapasakaan it kasong robbery with homicide si Mark Archie Torrefiel sa Aklan prosecutors office, naangkon eon it pamilya Ambay ro paunang hustisya sa brutal nga kamatayon it 23 anyos nga manager-reliever it RD pawnshop nga si Bonna Hercia Ambay.
Suno kay Bonifacio Ambay, ama it biktima nga maskin paalin hay napahagan-hagan ro kasubo nga andang nabatyagan.
Bukon suno kana it makatawo ag owa it kapatawaran ro gin-obra it 31-anyos nga suspek matapos nga makaangkon it 18 nga igo it pagbuno ro anang unga.
Nagapati man imaw nga eubus eamang nanda nga maangkon ro hustisya sa oras nga ma-convict sa kaso si Torrefiel ag mapapanaugan it reclusion perpetua ukon hasta nagakabuhi nga pagka-presu bangud nga owa man it death penalty sa nasyon.
Nagakasubo sigon ro bilog nga banwa it Pandan sa pagkamatay ni Bonna bangud nga maabu ro nagapalangga kana.
Plano it pamilya nga matapos ro daywang domingo hay igahatud eon raya sa anang ulihing paeahuwayan ukon sa Hunyo 25.
Sa pihak nga parte, ginpasaeamatan man it pamilya ambay ro kalibo pnp sa madasig nga aksyon ag pag-aresto sa suspek, kamana man sa katapo it media , nagtau it reward money ag iba pang nagbulig sa kaso.
Nagtau man sigon it bulig pinansiyal ro RD pawnshop ag ro lion hearts security agency.
Sa pihak nga parte, nagtau man it mensahe ro ama sa anang pinalangga nga unga nga si bonna matapos ro inquerst proceedings.
