KALIBO, Aklan—May nagakaigo eon nga preparasyon ro gobyerno sa posibleng pagtama it ‘The Big One.’
Raya hay ro magnitude 7.5 nga linog nga magatama sa Metro Manila ag kaiping nga mga probinsiya engkaso nga eubusan nga magahueag ro West Valley Fault.
Suno kay Terrence Toriano, head it Municipal Disaster Risk Reduction and Management Council ukon MDRRMC-Kalibo nga sa kamatuoran hay may assignment eon sanda kon siin nga lugar ro pagarespondehan.
Engkaso nga matabu, ro mga search and rescue team nga magahalin sa guwa it Metro Manila ro magahueag.
Nauna eon nga nagpaguwa it mandu ro Department of the Interior and Local Government (DILG) sa tanan nga mga local governments units ukon LGU’s nga magpatigayon it assessment sa tanan nga mga edipisyo ag iba pang imprastraktura para sa ginatawag nga Big One nga linog ag magbaeay it mga aksyon nga dapat nga obrahon sa pagresponde sa kalamidad.
