KALIBO, Aklan—Madugangan eon man ro tourism destination sa banwa it Kalibo sa nakataeana nga opening of lights sa Kalibo pastrana park sa maabot nga Disyembre 17.
Raya hay kabaliskaran sa mga naunang napabalita nga owa it masaksihan nga nakaandan nga event sa nasambit nga lugar.
Ginklaru ni Barangay Poblacion, Kalibo kagawad Mark Sy ag nagaserbi man nga tagapaghambae ni Kalibo mayor Juris Sucro nga maskin nga may igakabit nga mga Christmas lights sa mga puno it kahoy nga nakapalibot sa plaza, apang magiging dominante ro capiz shell, kun sa siin padayun ro pagkabit it mga nag aeabutan nga dugang nga capiz shell.
Sa pihak nga parte, ginpamalibaran man it LGU-Kalibo nga gusto nanda nga maduea ro tatak Lachica rason nga owa nagpatindog it higanteng Christmas tree sa lugar.
Suno kay Mark Sy nga sa anang pagkasayod ro giant Christmas tree hay nag-umpisa sa termino ni dating mayor Raymar Rebaldo ag ginpadayun eamang it administrasyong Lachica.
Mag-eowas sa mga capiz shell lights, magiging dugang nga atraksyon makaron nga holiday season ro life size Belen ag re-painting sa lugar partikular sa parte it childrens playground.
Magabutang man it palamute sa hallway nga nagakonekta sa St. John the Baptist Cathedral paagto sa Kalibo municipal police station nga ginapatihan nga magiging instagrammable spot.
Sa pihak nga parte, pagkatapos it Ati-Atihan festival, plano it LGU Kalibo nga temporaryong igasarado sa sueod it daywang buean ro plaza agud nga ipaidaeum sa total renovation partikular ro pagbutang it fountain.
