Ginkumpirma ni kagawad Mark Sy it Brgy. Poblacion nga gindonar ni mayor Juris Sucro ro anang unang sweldo bilang alkalde it lokal nga gobyerno it Kalibo.
Kapin sa P106,000 pesos sigon ro ginresibuhan it treasurers office kon siin ro nasambit nga kantidad it kwarta hay mahueog sa general fund nga intended para sa selebrasyon it Sto. Niño Ati-atihan festival sa dag-on 2023.
Ginpahayag dugang ni kagawad Sy nga desidido ro alkalde nga madayon ro selebrasyon it Ati-atihan sa idaeom it face to face activity.
Plano pa sigon kara nga pataasan ro premyo it ati-atihan tribe nga magapasakop ag dugangan ro mga aktibibad nga eubus nga makapasadya sa mga tawo sa uman nga pagbalik it nakaangdan ag dag-unan nga selebrasyon sa kapyestahan it patron nga si Sr. Santo Niño.
Madumduman nga haeos daywang dag-on nga nasuspinde ro street dancing ag iba pang aktibidad sa ginakabig nga Mother of All Philippine Festivals bangud sa pandemya.
