KALIBO, Aklan—Ginkumpirma ni Mark Sy, head it barangay affairs office it LGU-Kalibo nga uman nga magakandidato bilang alkalde it Kalibo si mayor Juris Sucro para sa anang ikaywang termino.
Raya hay sa tunga it nagakalhit nga balita nga magapadaeagan imaw bilang congressman it unang distrito it aklan kasunod it gina-alegar nga pa-survey ni Aklan 2nd district congressman Teodorico Haresco kun sa siin nagpangibabaw raya kontra sa daywang iba pang matunog ro pangaean sa nasambit nga posisyon nga sanday Jess Marquez ag USWAG Ilonggo partylist Rep. Jojo Ang.
Suno kana nga bilang political officer ni mayor Sucro, ginpasiguro sigon it opisyal nga pagatapuson nana ro anang termino bilang alkalde hasta sa dag-on 2028 bangud sa pagpati nga maabu pa imaw nga dapat obrahon ag tapuson .
Ginkasugtanan sigon ni mayor sucro ag ko mga matag-as nga opisyal it Tibyog-Aklan ag iba pang opisyal it probinsiya nga magpabilin imaw sa anang pwesto .
Apang indi pa masayuran ro anang plano sa pagtapos it anang termino.
Nabatyagan pa sigon ni mayor sucro ro pagpalangga it mga kalibonhon ag nagapati nga indi imaw pagpabay-an it mga raya sa anang ginapakisukoe para sa kamaeayran it taga-Kalibo.
Sa pihak nga parte, ginsaysay ni Mark Sy nga ro nagapangunang katuyuan ni mayor Sucro sa pagsunod sa makasaysayan nga ikaywang civilian mission it “atin ito coalition” nga maipakita ro anang pagkabaeaka sa mga mangingisda nga ginapigos it China coast guard sa West Philippine Sea partikular sa gina-agawan nga teritoryo sa scarborough shoal.
Naging kaparte sigon ro andang team sa pagbutang it boya sa exclusive economic zone it nasyon kamana man ro pagtau it food packs, bueong ag langis sa mga mangingisda sa lugar.
