KALIBO, Aklan — Ginsaysay ni Pandan Mayor Jonathan Tan sa Bombo Radyo ro traumatic experience kaibahan ro karelasyong beauty queen turned to actress nga si Bianca Manalo ag iba pang kaibahan matapos nga nagkueob ro ginsakyang speedboat ko Huwebes Santo, Marso 29 sa kadagatang sakop it Sebaste, Antique.
Sa interview it Bombo Radyo, ginpahayag ni Mayor Tan nga katuyuan kunta nandang magpadueong sa Mararison Island, sambilog sa sikat nga tourist destinations sa Culasi, Antique nga i-promote ro turismo idto.
Apang sa uwa ginaeaumang kahigayunan hay ginhampak sanda it maeagkong humbak nga naging rason it pagkueob it saeakyang pandagat.
Mabahoe nga leksyon sigon ro uwa nanda pagsuksok it life vest.
Parang pelikula sigon ro pag-eangot kara kaibahan ro sangka amigo it haeos daywang oras ag tunga agud makapangayo it bulig ag ma-rescue ro mga naaywanang kaibahan nga nakakabit sa speedboat kapin eon ro daywang ka mga onga.
Ginpahayag pa ni Mayor Tan nga insigidang nabayluhan it kasubo ro andang pagkaeowas kat gulpi eon lang nga atakehon sa tagipusuon ro anang igkampod ag bodyguard nga si Bennie Dable.
Mabahoe sigon ro anang pagpasaeamat sa Diyos sa ginta-ong pangaywang kabuhi kamana man sa mga residente nga nagbulig kanda.
Samtang, nagapati si Mayor Tan nga ro natabong trahedya hay kapin pang nagpalig-on sa andang relasyon ni Bianca.
Kaeakip sa mga nakaeowas sa insidente hay ro aktres nga si Ehra Madrigal ag ro anang mister.
