KALIBO, Aklan–Iba-iba ro naging opinyon it mga pumueuyu sa united kingdom angot sa pasabog ni Meghan Markle ag Prince Harry kontra sa British Monarchy sa ginpatigayon nga interview ni Oprah Winfrey.
Suno kay Bombo International Correspondent Andrei Von Masangya, sangka Aklanon ag presenteng nagatrabaho sa London nga ginsabat eon ni Queen Elizabeth ro isyu partikular ro akusasyong nagbuhi it racist nga pahayag angot sa anang unga ro sangka miyembro it royal family.
Gusto sigon it Reyna na resolbahon ro problema sa sueod it andang pamilya.
Angot kara, nagapati si Masangya nga nakaangkon eamang it owa pagka-ilintindihan ro pamilya rason nga indi eon dapat nga obrahon nga mabahoe nga isyu.
Owa man sigon ginhingaeanan ro miyembro it royal family nga nagbuhi it mga racist comment rason nga mabudlay nga mag speculate.
Posible man sigon nga ro natabu hay tuga it pressure it press rason nga nakabuhi ro mag-asawa it kapareho nga pahayag matapos nga magpanaog sa andang royal duties ko nagtaliwan nga dag-on.
Ginapatihan man nga posibleng na-misinterpret eamang ni Meghan ro pahayag kontra sa anang unga.
Samtang, haeos 40 porsiyento sigon ukon majority it mga pumueuyu sa UK ro nagasuporta gihapon sa royal family ag owa nagapati nga sanda hay racist samtang 20 porsiyento ro nagasimpatiya sa mag asawang Meghan ag Prince Harry ag ro iba hay undecided ukon owa it paki-alam.
