KALIBO, Aklan—Mayoriya sa limang presidential aspirants ro bukon it pabor sa Boracay Island Development Authority (BIDA Bill) sa bag-o eamang natapos nga ‘Panata sa Bayan: The Presidential Candidates Forum’ it Kapisanan ng mga Brodkaster ng Pilipinas (KBP).
Si Senador Panfilo Lacson eamang ro naghambae nga pagapirmahan nana ro nasambit nga proposed bill engkaso nga magdaog.
Suno kana nga kinahangean nga makaangkon it tourism estate mentality agud nga maka-engganyo it mas maabu pa nga mga turista sa Boracay.
Ginpahayag man ni Senador Manny Pacquiao nga itugyan eon lang sa Department of Tourism ag Department of Environment and Natural Resources (DENR) ro pagdumaea sa isla.
Nagpanindugan man si Vice President Leni Robredo ag Ka Leody de Guzman nga impportanteng maayos ro Boracay pinaagi sa tourism authority, apang kinahangean nga makonsulta anay ro stakeholders, lokal nga gobyerno ag iba pa eabi eon sa mga proyektong paga-obrahon.
Suno man kay Mayor Isko Moreno Domagoso, kinahangean ro suporta it national government sa Boracay sa baylo nga magbilog pa it state corporation nga imaw ro maga-manage sa isla.
Nasayuran nga “No show” si dating Senador Bongbong Marcos sa nasambit nga presidential forum bangud sa conflict sa anang schedule nga ginarespeto man sigon it KBP.
Nauna eon nga nagpahayag it pag-oponer ro lokal nga gobyerno it Aklan ag mga stakeholders sa Boracay sa BIDA bill nga sambilog sa mga ginaduso ni President Rodrigo Duterte agud nga masiguro ro development it bantog nga tourist destination ag mapabilin ro gin-umpisahan nga rehabilitasyon.
Uman nga igadihon ro proposed bill sa hulyo sa pagbukas it 19th congress.
