KALIBO, Aklan— Mayoriya sa mga turista nga nagbakasyon sa Boracay ko Semana Santa hay nakaguwa eon it Isla.
Suno kay Jean Pontero, Chief for Operations it Caticlan Jetty Port nga bulto it mga raya hay nagbiyahe ko Lunes, sa pagtapos it long weekend.
Apang kon maabu ro nagaguwa hay maabu man gihapon nga mga bisita ro naga-aeabutan nga mas ginpili nga indi makipagdueutdutan sa exodus it mga turista ko nagtaliwan nga Domingo.
Aminado man ro opisyal nga nagsobra sa carrying capacity nga 6,400 ro mga bisita ko Semana Santa, apang natigayon man nga mabalanse bangud nga kon may naga-abot hay may naga-uli man kada adlaw.
Base sa record, nakalista it pagbuhos it mga bisita ko Huwebes Santo nga nag abot sa kapin sa 18,000.
Samtang, ginpahayag pa ni Pontero nga naging very peaceful, orderly ag owa it untoward incident sa selebrasyon maskin nga bumuhos ro mga turista.
Sambilog sa mga aberya nga nailista it pilang bisita hay ro pagpa-booked sa mga hotels nga ulihi eon natukliban nga bukon it acrredited sa Department of Tourism rason nga gin-usuyan sanda it ibang matiniran.
Madumduman nga ro hotel occupancy ko Holy Week hay nag abot sa 80 to 90%, kun sa siin haeos fully-booked ro mga raya.
Nakabulig sigon sa pagpahagan-hagan it pila sa Caticlan Jetty Port ro mga turista nga nagbayad online it andang terminal fee ag iba pang baeayran .
