KALIBO, Aklan—Mayorya sa gihapon sa mga naga-agto nga turista sa isla it Boracay hay halin sa National Capital Region.
Raya hay sa pihak nga ginpaidaeum sa Alert Level 3 ro rehiyon ag uman nga gin-require ro negatibong RT-PCR test result.
Sa ginpaguwa nga datos it Malay Tourism Office, nag abot sa 28,060 ro tourist arrivals sa sikat nga isla umpisa Enero 1 hasta 16, 2022, kun sa siin 10,638 nga bisita ro naghalin sa NCR.
Raya hay sa atubang it paeag it Omicron variant it COVID-19.
Nailista ro mataas nga numero it mga nag-aeabutan nga turista ko Enero 2 nga may 4,104.
Umpisa enero 1 hasta 8, ro average nga daily arrivals hay 2,000 hasta 4,000 apang pag-abot it enero 9 hasta 17 hay naga-abot eon lang sa 200 hasta 400.
Nagapangaywa sa mga turista nga nagabisita sa boracay hay halin sa rehiyon it Calabarzon nga may 4,932 ag ginsundan it Western Visayas nga may 4,528.
Ro mag-eowas sa swab test nga requirement sa pagbyahe, nagpatuman man it age restrictions , kun sa siin bawae nga makasueod sa isla ro 12 anyos panaba.
