KALIBO, Aklan–Balik eon sa normal ro operasyon it Municipal Disaster Risk Reduction and Management Office (MDRRMO)-Kalibo umpisa ko Hulyo 1.
Raya hay matapos nga insigidang mataw-an it solusyon ni Kalibo Mayor Juris Bautista Sucro ro problema nga ginpaabot it MDRRMO angot sa posibleng pagpaiway it andang operasyon bangud sa kakueangan it personnel.
Suno kay MDRRMO-Kalibo Head Terrence Toriano nga ginakalipay nanda ro madasig nga pagtao it solusyon it bag-ong alkalde sa andang operasyon.
Temporaryo eamang sigon nga nagpundo ro andang operasyon ko Hunyo 30 apang insigida man nga ginbalik pagka-aga.
Samtang, naging dire-diretso man sigon ro operasyon it andang tactical emergency operation center bangud ginadumaeahan raya it mga permanent personnel.
Ginapahayag nga kapin sa 60 porsyento pa it mga dating MDRRMO personnel ro nabilin.
Ro 40 porsyento sigon nga mga bag-ong miyembro it response team hay nakataeana man nga igapaidaeom sa maidid nga training angot sa safety and rescue.
Angot kara, may mga plano man sigon si Mayor Sucro para mas pang mapabaskog ro response effort it MDRRMO sa idaeom it anang administrasyon.
