KALIBO, Aklan—Ginklaro ni Municipal Disaster Risk Reduction Management Officer (MDRRMO) Division Chief Terrence June Toriano nga indi eun kinahangean pang magsuksok it face shield ro mga driver nga nagabyahe it pampublikong saeakyan.
Sa baylo, dapat nga butangan eamang it barrier sa tunga it pasahero ag driver agud malikawan ro pagkaangkon it close contact.
Sa mga tricycle driver man nga gustong magsuksok it proteksyon sa andang kaugalingon, ginrekomenda eamang kara nga helmet eun lang ro andang gamiton.
Raya hay bangud pwedeng maging rason it digrasya ro paggamit it face shield nga bukon it angay ag bagay sa andang ginamanehar nga saeakyan.
Sa mga nagamaneho it motorsiklo hay face mask eamang ro kinahangean kara nga suksukon ag full face helmet nga nakapanaog ro glasses sa may prenti nga porsyon.
Dugang pa kara nga sandig sa guideline it Land tranportation office ukon LTO nga dapat siguraduhon it mga driver nga euwas ro andang mga pasahero.
Bangud kara, ginsuhestiyon nana nga magbutang eun lang it barrier sa tunga it driver ag mga pasahero ag butangan it maisot nga “buho ukon gabot” para sa pagdawat it pamasahe
Samtang sa pihak nga parte, uman nga nagpadumdom si Toriano sa publiko nga indi pagkalipatan ro ginapatuman nga health protocol agud malikawan nga makaangkon it local transmission it COVID-19 samtang nagapabilin nga una sa gihapon sa idaeom it Modified General Community Quarantine ro bilog nga probinsya it Aklan.
Suno kana nga samtang may ginapatuman nga community quarantine hay posibleng maaresto ag magapangatubang it penalidad ro sin–o man nga mag-eabag kara.
Raya hay kasunod man it naga-eupok nga balita nga maabo eun ro nalipat sa mga protocol kapareho eamang it curfew ordinance ag pag-obserba sa physical ukon social distancing.
