KALIBO, Aklan—Nag-apela si Municipal Disaster Risk Reduction and Management Office (MDRRMO)-Kalibo officer Terrence Toriano sa publiko nga indi basta-basta nga magpati sa mga nagakalhit nga mensahe nga makaangkon man it mabaskog nga linog sa probinsiya it Aklan nga nauna eon nga nagkalhit sa social media sa Facebook ag messenger.
Suno kay Toriano nga owa it sin-o man nga makasayod kun hin-uno makaangkon it pag-uyog ag owa sigon it teknolohiya nga pwedeng makahambae kun hin-uno matabu ro linog.
Ginpahayag dugang nga indi masyadong magpati sa mga ginatawag nga “signos” sa baylu hay mas pang pabaskugon ro pagtu-o sa Diyos.
Ro mga kapareho nga mga mensahe suno kana hay nagatuga eamang it kahadlok sa mga pumueuyu.
Ginlaygay man nana sa publiko nga balewalaon ro nasambit nga mga mensahe ag likawan nga ipasa sa iba.
Gindugang pa kara nga bisitahon ro website it Philippine Institute of Volcanology and Seismology (Phivolcs) para sa mga mas mapatihan nga impormasyon.
Mag-eowas kara, gin-insister ni Toriano nga dapat nga magpahaum kaibahan ro “go bag ukon disaster kit, magpasakop sa mga community drills sa linog ag iba pang kalamidad ag sayuron ro mga emergency numbers it inyong natungdan nga barangay ag municipal disaster risk reduction and management offices”.
