KALIBO, Aklan—Nagapadayun makaron ro search and rescue operation it Municipal Disaster Risk Reduction and Management Office (MDRRMO)-Kalibo matapos nga maduea ro sambilog sa tatlong mangingisda nga nagpaea-ot ko gabi-i it Sabado.
Suno kay Mr. Terence Jun Toriano, head it MDRRMO-Kalibo nga nabungguan it barko ro baroto nga ginasakyan it tatlong mangingisda sa kaeawran sa tunga it probinsya it Capiz ag Masbate.
Maswerteng naka-eowas ro daywang mangingisda nga sanday Erald Retos ag Leo Arilas nga parehong residente Bakhaw Norte, Kalibo samtang padayun man nga gina-usoy ro sambilog pa nandang kaibahan nga si Ricky Peralta, 57-anyos.
Ginpahayag ni Toriano nga ap-at sa andang mga tawuhan makaron ro naka-deploy para magpatigayun it search and rescue operation.
Nagpanawagan man raya sa publiko nga inisgidang makipag-angot kanda engkaso nga makit-an ro nasambit nga persona.
