KALIBO, Aklan — Naka-deploy eon ro emergency response unit kaangot sa selebrasyon it fiesta minatay.
Suno kay Municipal Disaster Risk Reduction Management Office (MDRRMO)-Kalibo head Terrence Toriano nga nauna eon sanda nga nagpatigayon it ocular inspection sa area kon sa siin sanda may deployment partikular sa mga sementeryo sa banwa it Kalibo.
Suno kana, nagtukod sanda it mga tent ag preparado eon ro tanan sa pagresponde ag pag-assist it mga pumueoyo nga magabisita sa andang mga himata sa mga nagapangunang sementeryo sa banwa.
May kaangtanan kara, nagpadumdom si Torriano sa publiko nga magdaea it kaugalingon nga tubi partikular ro may mga hypertension kamana man pagkaon kon mas ginapili nga magtinir it mas mabuhay nga oras sa pantyon it andang pamilya agud nga makalikaw sa food poisoning.
Inde suno kana magkahuya nga magpaeapit sa andang mga myembro engkaso nga nagakinahang-ean it madaliang bulig.
Sa pihak nga parte, target it lokal nga gobyerno it Kalibo nga maabot ro 400 bilog nga close circuit television nga ma-install sa nasambitang banwa sa sueod it tatlong dag-on.
Katuyuan sigon kara nga maipadayon ro pagiging “business friendly municipality” kamana man kon nagahandom nga maging syudad ro Kalibo.
Ro model surveilance system sigon kara hay ro nasyong Korea, Japan ag London.
