KALIBO, Aklan–Nakataeana nga mag-deploy it mga tawuhan ro Municipal Disaster Risk Reduction and Management Office ukon MDRRMO sa ap-at nga mga nagapangunang lugar sa kalibo para sa maabot nga Semana Santa.
Ginpahayag it Terrence Toriano, head it MDRRMO-Kalibo nga magabantay sanda sa mga lugar nga kaeabanan nga gina-agtunan it mga deboto partikular sa St. John The Baptist Cathedral, St Jude Thaddeus Church, Tigayon Hills ag sa simbahan sa Linabuan Norte, Kalibo para sa igapatuman nga emergeny response ag pagsunod sa mga protocols.
Mag-eowas kara, maga-monitor man sanda it mga baybay kun sa siin pila sa mga pumueuyu hay naga-agto sa nasambit nga adlaw.
Sa pihak nga parte, ginhinyu man ni toriano ro publiko eabi eon ro mga magasunod sa prusisyon nga makaangkon it disiplina sa pagsunod sa linya ag indi mag-inistorya agud nga mapatuman ro physical distancing.
Ginalikawan sigon nanda nga maggamit it megaphone agud nga indi madisturbo ro mga nagapangadi kamana man nga magabitbit sanda it mga placards angot sa pagsunod sa minimum health protocols.
Sa pihak nga parte, gina monitor man sigon nanda ro daywang bagyo nga posibleng magsueod sa Philippine area of responsibility sa masunod nga domingo.
